• ក្រុមកីឡា ជាង១ពាន់នាក់ នឹងត្រូវចាក់វ៉ាក់សាំងកូវីដ ដើម្បីបង្កើតភាពកក់ក្តៅ លើការពង្រឹងសមត្ថភាព
    កីឡាផ្សេងៗ 2 months ago 80 Views

    ក្រុមអ្នក​កីឡា មាន​មន្រ្តីដឹកនាំ​ គ្រូ​បង្វឹក ព្រមទាំង​កីឡាករ កីឡាការិនី​ជម្រើស​ជាតិ​កម្ពុជា មក​ពី​សហព័ន្ធ​កីឡាជាតិ​ចំនួន៣៩ រួមទាំង​ក្រុម​កីឡា​ជន​ពិការ​​សរុប​ចំនួន​១០៥៥​នាក់ នឹង​ត្រូវ​ចាក់វ៉ាក់​សាំងការពារជំងឺ​កូវីដ​១៩ ជា​បន្ត​បន្ទាប់​គ្នា ពី​ថ្ងៃទី​២ ដល់​ថ្ងៃទី​៤ ខែមីនា ឆ្នាំនេះ។

    អគ្គលេខាធិការ​នៃ​គណៈកម្មាធិការ​ជាតិ​រៀបចំ​ការ​ប្រកួត​កីឡា​ស៊ីហ្គេម​លើក​ទី៣២ ឆ្នាំ ២០២៣ (CAMSOC) លោក វ៉ាត់ ចំរើន បាន​ចាត់ទុក ការ​យក​ចិត្ត​ទុក​ដាក់​ពី​ថ្នាក់​ដឹកនាំ ​ក្នុង​ការ​ផ្តល់​ជូន​ការ​ចាក់​វ៉ាក់សាំង​ការពារ​កូវីដ១៩ ដំបូង ដល់​ក្រុម​អ្នកកីឡា​នេះ​ថា ជា​ការ​បង្កើន​នូវ​ទំនុក​ចិត្ត និង​ភាព​កក់ក្តៅ ទៅ​ដល់​​ក្រុមជម្រើសជាតិ ដើម្បី​​បាន​​ចេញ​ទៅ​ហ្វឹកហាត់ ពង្រឹង​សមត្ថ​ភាព​ត្រៀម​ខ្លួន​ចូលរួម​ការ​ប្រកួត​អន្ដរជាតិ​ធំៗ​នានា ពិសេសការ​ប្រកួត​ស៊ីហ្គេម នៅ​ប្រទេស​​វៀតណាម ចុងឆ្នាំ​២០២១​នេះ និងស៊ីហ្គេម ឆ្នាំ​២០២៣ នៅ​កម្ពុជា។

    លោក វ៉ាត់ ចំរើន បាន​ប្រាប់​ប្រព័ន្ធ​ផ្សព្វផ្សាយ​ថា៖​ «សម្រាប់​អ្នកដែល​មាន​ឈ្មោះចាក់​វ៉ាក់សាំង លើក​នេះ សូម​ចូលរួម​​ចាក់​ឱ្យ​បាន​គ្រប់ៗគ្នា​ ដោយ​ការស្ម័គ្រចិត្ត ដើម្បី​ផ្តល់​ជំនឿចិត្ត និង​ភាព​កក់​ក្តៅ​ ក្នុងចិត្តសាស្រ្តកីឡា ត្រៀម​ទៅ​ហ្វឹកហាត់​ក្រៅ​ប្រទេស និង​ប្រកួត​កីឡា​អន្តរ​ជាតិ​នា​នា ក្នុង​ឆ្នាំ​២០២១ ជា​ពិសេស​​ចូល​រួម​ប្រកួត​ប្រជែងយក​​មេដាយ នៅស៊ីហ្គេម លើក​ទី៣១ នាខែវិច្ឆិកា-ធ្នូ ឆ្នាំ២០២១ នៅ​ប្រទេស​វៀតណាម ក៏ដូចជា​ហ្វឹក​ហាត់​ក្នុងប្រទេស និង​ក្រៅ​ប្រទេស ត្រៀម​ឆ្ពោះ​ទៅ​ទទួល​រៀបចំ​ធ្វើ​ជា​ម្ចាស់ផ្ទះ ស៊ីហ្គេម លើកទី៣២ និង​អាស៊ាន​ប៉ារ៉ាហ្គេម លើកទី១២ ឆ្នាំ២០២៣ នៅកម្ពុជា»។

    លោក វ៉ាត់ ចំរើន ដែល​បាន​ចាក់វ៉ាក់សាំង​រួច​ហើយ​នោះ បាន​​បញ្ជាក់​ថា៖ «បើ​សិន​យើង​ធ្វើ​ការចាក់​វ៉ាក់សាំង​ឱ្យ​ហើយ​ពេល​នេះ គឺ​យើង​នឹង​មាន​​ទំនុក​ចិត្ត​ក្នុង​ខ្លួន ព្រោះ​ការ​ទទួល​វ៉ាក់សាំង​នេះ គឺជា​ប្រការ​មួយ ដែល​ជំរុញ​ទឹក​ចិត្ត​ឱ្យ​កីឡាករ កីឡាការិនី និង​មន្ត្រី ​មាន​ទំនុក​ចិត្ត​ក្នុង​ការ​អភិវឌ្ឍ​កម្លាំងកាយ និង​កម្លាំងចិត្ត ព្រម​ទាំង​បច្ចេកទេសឱ្យ​បាន​រឹងមាំ​វិញ»។

    សម្រាប់​ក្រុម​អត្តពលិក គ្រូ​បង្វឹក មន្រ្តី និង​ថ្នាក់​ដឹកនាំ​សរុប​​១០៥៥​នាក់ ដែល​នឹង​ត្រូវ​ចាក់វ៉ាក់សាំង​លើក​នេះ ត្រូវ​បានកំណត់​ពេល​វេលាចាក់ ទៅតាមកាល​វិភាគ​រួច​រាល់​អស់​ហើយ ដោយ​ក្នុង​នោះ ​អ្នក​ចាក់​(សម្រាប់​ថ្ងៃ​ទី​១ ឬចាក់លើក​ទី​១) នៅ​ថ្ងៃទី​២ ខែមីនា មាន​ចំនួន​៤២៤នាក់ នៅ​ថ្ងៃទី​៣ មានចំនួន​៤១៣នាក់ ហើយ​នៅ​ថ្ងៃទី​៤ ខែមីនា មាន​ចំនួន​២១៨នាក់៕

     

  • Loading...
  • Recent Posts