• ក្រុមអត្តពលិកហែលទឹក ៩៨នាក់ នឹងត្រូវប្រកួតប្រជែងគ្នា នៅថ្ងៃនេះ ដើម្បីរំឭកគុណ ដល់ស្ថានិកកំពូល
    កីឡាផ្សេងៗ 2 months ago 74 Views

    ក្រុមយុវជន និងយុវនារី ដែលជា​ថ្នាក់​ថ្នាល់​លើប្រភេទ​កីឡា​ហែល​ទឹក​ចំនួន​៩៨​នាក់តំណាង​ឱ្យ​ក្លិបចំនួន​៩ នឹង​ចាប់ប្រកួត​ប្រជែង​គ្នា ក្នុង​ការ​ប្រកួតកីឡា​ហែលទឹក​ ជ្រើសរើស​ជើង​ឯក​​យុវជន ព្រឹទ្ធាចារ្យ​ហែមថុន លើក​ទី​៤ ឆ្នាំ២០២១ នៅអាងហែល​ទឹក​នៃពហុកីឡដ្ឋានជាតិ នា​ថ្ងៃ​​សុក្រ​នេះ នឹង​គ្រោង​បញ្ចប់នៅ​ថ្ងៃ​សៅរ៍។

    ការ​ប្រកួតកីឡា​ហែលទឹក​ ជ្រើសរើស​ជើង​ឯក​​យុវជន ព្រឹទ្ធាចារ្យ​ហែមថុន នេះ ត្រូវ​បាន​ផ្តើម​ផ្តើម​ឡើង​ដោយ​លោក​ទេសរដ្ឋមន្រ្តី ស៊ុន ចាន់ថុល ដែល​ជា​ប្រធានសហព័ន្ធ​ខ្មែរ​កីឡា​ហែល​ទឹក ហើយ​គោល​បំណង​នៃ​ការប្រកួតនេះ គឺ​ដើម្បីរំឭក និងដឹក​គុណ​ដល់​ស្ថាបនិក​កំពូល គឺ​ព្រឹទ្ធាចារ្យ ហែម ទុន ដែល​លោក​បាន​លះ​បង់​ច្រើនបំផុត នៅ​ក្នុង​វិស័យ​កីឡា​ហែល​ទឹក​​របស់កម្ពុជា​នេះ មុនពេល​លោក​បាន​ស្លាប់។

    លោក ហែម គីរី អគ្គលេខាធិ​ការ​សហ​ព័ន្ធ​ខ្មែរ​កីឡា​ហែល​ទឹក ​បាន​​ប្រាប់​ថា៖​«ការ​ប្រកួត​ហែល​ទឹក​ជ្រើសរើស​ជើងឯក​យុវជន ព្រឹទ្ធាចារ្យ ហែម ថុន នេះ ជា​គំនិត​ផ្តួច​ផ្តើម​របស់​ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋ​មន្ត្រី​ក្រសួង​សាធារណការ និង​ដឹក​ជញ្ជូន និង​ជា​ប្រធាន​សហ​ព័ន្ធ​ ដើម្បី​ជាការ​រំឭក​​គុណូប​ការៈ និង​ស្នា​ដៃ​របស់​លោក ហែម ថុន និងដើម្បី​​បំផុស​ឱ្យ​​កីឡាករ កីឡាការិនី យុវជនខ្មែរ និង​បរទេស​ចូលរួម ព្រម​ទំាង​អាណា​ព្យាបាល​ពួកគេ​ចូលរួម​គាំទ្រ​កូនៗ​នៅ​ពេល​ប្រកួត»។

    កូន​ប្រុស​របស់​លោក​ព្រឹទ្ធាចារ្យ ហែម ទុន លោក ហែម គីរី បានបន្តថា ការ​បើក​ចំហរ​ដល់​យុវជន​បរទេសឱ្យ​ចូលរួម​នៅ​ឆ្នាំ​នេះ នឹង​មាន​កីឡាករ កីឡាការិនី​ចូល​រួម​ច្រើន និង​មាន​ការ​ប្រកួត​ខ្លាំង​ផ្នែក​បច្ចេក​ទេស​រវាង​កីឡាករ​តាមក្លិ​ប​ធំៗ ក្លិប​ឯកជន និង​សាលារៀន​អន្តរ​ជាតិ ហើយ​ការ​ធ្វើការ​បែប​នេះ មិនមែន​ជា​ទង្វើ ដែល​ធ្វើ​តាម​ការ​នឹក​ឃើញ​នោះឡើយ​ គឺ​ប្រទេស​ជិត​ខាង​​យើង និង​ពិភព​លោក​ ក៏​រៀបចំ​ការ​ប្រកួត​យុវជន ​តាម​កម្រិត​អាយុ​បែប​នេះ​ដែរ ដោយ​​គេ​អនុញ្ញាតឱ្យ​យុវជនបរទេស ចូលរួមប្រកួតប្រជែងដូចគ្នាផងដែរ»។

    អគ្គលេខាធិការ​រូបនេះ បាន​បញ្ជាក់ថា៖​ «ការធ្វើដូច្នេះ គឺ​ក្នុង​គោល​បំណង​ពង្រឹង​សមត្ថ​ភាព​កីឡាករ កីឡាការិនីកម្ពុជា ឱ្យ​មានកម្រិតកាន់តែខ្ពស់ ព្រោះ​នៅ​ពេល​មាន​អត្តពលិក​បរទេស និង​អ្នក​ដទៃ​ចូល​រួមច្រើន វា​​នឹងធ្វើ​ឱ្យ​​មាន​សកម្មភាព​ប្រកួត​ប្រជែង​ខ្លាំង ​ដូច​ជា​អត្តពលិក​បរទេស ​មាន​កម្រិត​ខ្ពស់​ អាចទាញឱ្យ​អត្តពលិក​ មាន​ការ​ប្រឹង​ប្រែង​កាន់​តែ​ខ្លាំង​ឡើង»។

    សម្រាប់​ក្រុមអត្តពលិកទាំង​៨៩​នាក់ ដែល​បាន​ចូល​រួម​ប្រកួត នៅ​ឆ្នាំ​នេះ ត្រូវ​បាន​​ចែក​ចេញ​ជា​៣​ប្រភេទ គឺ​ប្រភេទ​អាយុ ​សម្រាប់​កុមារា​ចាប់​ពី​អាយុ​១០​ដល់​១១​ឆ្នាំ ​ទី២ សម្រាប់​កុមារា កុមារី​អាយុ ចាប់​ពី​១២​ទៅ​១៣​ឆ្នាំ និង​ប្រភេទ​ទី​៣ សម្រាប់​វ័យ​យុវជន យុវ​នារី ដែល​មាន​អាយុ​ចាប់​ពី​១៤​ដល់​១៦​ឆ្នាំ។

    ចំពោះប្រភេទ​ក្រុមទី​១ ត្រូវ​​ប្រកួត​លើ​វិញ្ញាសា​​​ហែល​របៀប​សេរី​ចម្ងាយ​៥០​ម៉ែត្រ ហែល​របៀប​កង្កែប៥០​ម៉ែត្រ ហែល​របៀប​ផ្ងារ​៥០​ម៉ែត្រ ហែល​របៀប​មេអំបៅ​៥០ម៉ែត្រ ចំណែក​​ប្រភេទ​អាយុ​ចាប់​ពី​១២​ទៅ​១៣​ឆ្នាំ គឺ​ហែល​របៀប​ផ្ងារ​ចម្ងាយ​៥០​ម៉ែត្រ ​ហែល​របៀប​មេអំបៅ​៥០​ម៉ែត្រ ហែល​របៀប​សេរី​១០០​ម៉ែត្រ និង​វិញ្ញាសា​ហែល​របៀប​កង្កែប​១០០​ម៉ែត្រ ហើយ​​សម្រាប់​​ប្រភេទទី​៣ មាន​អាយុ​ចាប់​ពី​១៤​ដល់​១៦​ឆ្នាំ ​ត្រូវ​ប្រកួត​លើ​វិញ្ញាសា​​ហែល​របៀបមេ​អំបៅ​៥០​ម៉ែត្រ ហែល​របៀប​ផ្ងារ​១០០​ម៉ែត្រ ហែលរ​បៀប​សេរី​២០០​ម៉ែត្រ និង​ហែល​របៀប​កង្កែប​ចម្ងាយ​២០០​ម៉ែត្រ៕

  • Loading...
  • Recent Posts