• វាយសី នឹងបើកការប្រកួតថ្នាក់ជាតិ ជ្រើសរើសយកអ្នកមានសមត្ថភាពឆ្នើមៗ ត្រៀមទៅស៊ីហ្គេម
    កីឡាផ្សេងៗ 2 weeks ago 40 Views

    ការ​ប្រកួត​កីឡាវាយ​សី​ជ្រើស​រើស​ជើង​ឯក​ថ្នាក់​ជាតិ​ឆ្នាំ ២០២០ ​ដែល​ខកខាន មិនអាច​រៀបចំ​បាន ដោយ​សារ​វិបត្តិ​ជំងឺ​កូវីដ១៩នោះ ត្រូវបាន​សហព័ន្ធ​កីឡា​វាយ​សី​កម្ពុជា ​ ​លើក​យកមក​ធ្វើ​​ឡើង​វិញ នៅ​អាគារ​សហព័ន្ធ​ ​ក្នុង​ពហុកីឡាដ្ឋាន​ជាតិ​អូឡាំពិ​កម្ពុជា ពី​​ថ្ងៃទី​១៦ ដល់​ថ្ងៃទី​១៨ ខែមករា ឆ្នាំ​២០២១​នេះ។

    សម្រាប់ការ​ប្រកួត​កីឡា​វាយសី​ជ្រើស​រើសជើង​ឯកថ្នាក់ជាតិ ឆ្នាំ​២០២០​នេះ មាន​​ក្លិប​ និងសម្ព័ន្ធ​កីឡា​វាយសី​ចំនួន​១៥​ បាន​ដាក់​ពាក្យ​ចូល​រួមប្រកួត រួម​មាន​ក្លិប​វាយ​សី​ពហុកីឡ​ដ្ឋាន​ជាតិ, ព្រះខ័នរាជ, 1 2 Play, ការពារ​អាកាស ជ/គ, ភ្នំពេញ, ក្រសួងមហាផ្ទៃ, ក្រសួងសេដ្ឋកិច្ច និងហិរញ្ញវត្ថុ ព្រម​ទាំង​សម្ព័ន្ធ​កីឡា​វាយ​សី​ខេត្ត​កំពង់ស្ពឺ ព្រៃ​វែង ព្រះសីហនុ ប៉ៃ​លិន សៀម​រាប កំពង់​ឆ្នាំង កំពង់​ចាម និង​ខេត្ត​ស្វាយ​រៀង។

    ចំពោះ​កីឡាករ​១១៤នាក់ និង​កីឡាការិនី​២៥​នាក់ តំណាង​ឲ្យក្លិប និងសម្ព័ន្ធ​កីឡា​វាយ​សី ទាំង​១៥​ខាង​លើ​នេះ ពួក​គេ​ នឹង​ត្រូវ​ប្រកួត​ប្រជែង​គ្នា ​នៅ​លើ​វិញ្ញាសា​ប្រកួត​ចំនួន​៧ ហើយ​​​​ក្រុមអត្តពលិក ជា​ម្ចាស់​​ជយលាភី ដែល​បង្ហាញ​សមត្ថ​ភាព​ល្អ នៅក្នុងការ​ប្រកួត​នេះ សហព័ន្ធ នឹង​ត្រូវ​ដាក់​នៅ​ក្នុង​បេក្ខភាព ​​ដែលត្រូវ​​​វាយ​តម្លៃ ដើម្បី​រក​អត្តពលិក​ឆ្នើម​ចំនួន​៧នាក់​ ត្រៀម​សម្រាប់​ចេញ​ទៅ​ប្រកួត​ស៊ីហ្គេម តំណាង​ឲ្យ​កម្ពុជា។

    លោក​ ជាម ​សុភា​ អគ្គ​លេខាធិការ​សហព័ន្ធ​កីឡា​វាយ​សី​កម្ពុជា បាន​​ប្រាប់​​ថា៖​ «កីឡាករ​ការិនី​ ដែល​ជ្រើស​រើស​ចេញ​ពី​ការ​ប្រកួត​​ថ្នាក់​ជាតិ​ឆ្នាំ២០២០​នេះ ​នឹង​ត្រូវ​ដាក់​នៅ​ក្នុង​បេក្ខភាព ដើម្បី​វាយ​តម្លៃ​ដាក់​បញ្ចូល​ជា​អត្តពលិក​ឆ្នើម​របស់​​សហព័ន្ធ​ ដោយ​​រង់​ចាំ​សេចក្តី​សម្រេច​ពី​គណៈ​កម្មាធិការ​ប្រតិបត្តិ​ និង​ឆ្លងទៅ​​ឯកឧត្តម​ឧត្តមសេនីយ៍ឯក ​លី ​កុសល ជា​ប្រធាន​សហព័ន្ធ»។

    ​ លោក​ឧត្តម​សេនីយ៍ទោ ​ជាម ​សុភា បាន​បន្ថែម​ថា៖ ​«​​ការ​វាយ​តម្លៃ​រក​អត្តពលិក​ឆ្នើម​នេះ ក៏​ព្រោះ​តែ​​សហព័ន្ធ បាន​កំណត់​ជ្រើស​រើស​យកអត្តពលិក​​មាន​សមត្ថ​ភាព​ឆ្នើមៗ​ចំនួន​៧នាក់ ដើម្បី​បំពាក់​បំប៉ន​ហ្វឹកហាត់ ​ជា​ជម្រើស​ជាតិ​បម្រុង សម្រាប់ត្រៀម​ទៅ​ប្រកួត​​​ស៊ីហ្គេម​ លើក​ទី​៣១ ​ឆ្នាំ​២០២១ នៅ​ប្រ​ទេស​វៀត​ណាម ​​និង​ស៊ីហ្គេម ​លើក​ទី៣២ ​ឆ្នាំ​២០២៣​ ​ដែល​កម្ពុជា​ ត្រូវ​ធ្វើជា​ម្ចាស់​ផ្ទះ​»៕

  • Loading...
  • Recent Posts