• សហកីឡាព័ន្ធជាតិ ចំនួន៣០ មិនបានរៀបចំការជើងឯកថ្នាក់ជាតិ ប្រចាំឆ្នាំ២០២០
    ប្រដាល់ក្នុងស្រុក 4 weeks ago 46 Views

    សហព័ន្ធ​កីឡាជាតិ​ចំនួន​៣០ មិនអាច​រៀបចំ​ការ​ប្រកួតជ្រើសរើសជើង​ឯក​ថ្នាក់​ជាតិ ប្រចាំ​ឆ្នាំ​២០២០​របស់ខ្លួន​ ទៅតាមកាលបរិច្ឆេទបាននោះ​ទេ ហើយបញ្ហា​នេះ ដោយសារ​តែ​ការ​អូសបន្លាយនៃ​ការ​រីក​រាលដាល​ជំងឺ​កូវីដ​១៩ នៅ​ក្នុង​ប្រទេស​កម្ពុជា នៅតែ​បង្កជា​ហានិភ័យ ម្តង​ហើយម្តង​ទៀត មិនស្រាកស្រាន្ត។

    គិតត្រឹម​ពេលនេះ មានតែ​សហព័ន្ធ​កីឡាជាតិ ចំនួន​​១០​ប៉ុណ្ណោះ បាន​រៀបចំ​ការ​ប្រកួតជ្រើសរើស​ថ្នាក់ជាតិ ប្រចាំ​ឆ្នាំ​២០២០ បានរួចរាល់ ក្នុងនោះ​មាន​សហ​ព័ន្ធ​កីឡា​ទាញ​​ព្រ័ត្រកម្ពុជា តេក្វាន់ដូ (WTF) បាល់​ឱប តេក្វាន់ដូ (ITF) ការ៉ាតេ បេស្បល វាយកូនខ្លីលើ​តុ សូហ្វតិន្នីស ហែល​ទឹក និងសហព័ន្ធ​ខ្មែរ​អត្តពលកម្ម​ស្ម័គ្រចិត្ត បាន​រៀបចំ​ការ​ប្រកួត​ថ្នាក់ជាតិ បាន​រួច​រាល់ ចំណែក​​គណៈកម្មាធិការជាតិ​ប៉ារ៉ាឡាំពិក​កម្ពុជា ទើប​ប្រកួត​បាន​កីឡា​បាល់ទះ​​អង្គុយ​មួយ​ប៉ុណ្ណោះ គឺនៅ​សល់​ប្រភេទ​កីឡាជន​ពិការ​ជាច្រើន​ទៀត ដែល​មិន​ទាន់​បាន​រៀបចំ។

    ផ្ទុយពីនេះ សហព័ន្ធ​កីឡាជាតិ​ចំនួន​៣០​ទៀត រួមមាន​សហព័ន្ធកម្ពុជា​បង្ហាត់ជិះសេះ យូដូ កាយសម្ព័ន្ធ ទោចក្រាយាន (ជិះកង់) គុនដាវ គុនល្បុក្កតោ ចំបាប់ តុងហ្គីលម៉ូដូ ទូក​ក្តោង ទ្រីយ៉ាត្លុង បាញ់កាំភ្លើង បាល់ទះ បាល់​ទាត់ បាល់បោះ ប្រដាល់​គុនខ្មែរ ប្រដាល់សកល ម៉ូតូទឹក កីឡារាំ វ៉ូវីណាម វ៉ូស៊ូ វាយកូនគោល វាយកូនបាល់ វាយសី, កីឡាសិស្ស និងនិស្សិត, សីដក់ និង​ឈិនឡូន, ប៊ូល និងប៉តង់, ទូកកានូ និងរ៉ូអ៊ីង, សូរីនហ្ស៊ិកាំប៉ូ កីឡាឡើង​ភ្នំ និង​សហ​ព័ន្ធ​កីឡា​អុកចត្រង្គកម្ពុជា នៅមិនទាន់​បាន​រៀបចំការ​ប្រកួត​ជ្រើសរើសជើង​ឯក​ថ្នាក់​ជាតិ របស់ខ្លួននៅ​ឡើយ​ទេ។

    យ៉ាង​ណា​ក៏​ដោយ អគ្គលេខាធិការ​អ្នក​នាំ​ពាក្យ​ក្រសួងអប់រំ យុវជន និងកីឡា លោក រស់ សុវាចា បាន​ប្រាប់ថា សហព័ន្ធ​កីឡា​ជាតិ ដែល​មិនទាន់បាន​រៀបចំការ​ប្រកួត​ថ្នាក់ជាតិ ប្រចាំ​ឆ្នាំ​២០២០ អាច​លើក​ពេល​ទៅ​ធ្វើ​ នៅ​ដើម​ឆ្នាំ២០២១ បាន បើ​សិន​ជាករណី​ឆ្លង​ជំងឺកូវីដ​១៩ នៅ​កម្ពុជា មានភាពធូរស្រាល​ឡើងវិញ។

    លោក រស់ សុវាចា បាន​​ប្រាប់កាសែត​ក្នុងស្រុក​មួយ កាលពីពេលថ្មីៗ​នេះ​ថា ៖​«កន្លង​មក  ក្រសួង​អប់រំ យុវជន និងកីឡា បាន​ចេញ​លិខិត​ផ្អាក​សកម្ម​ភាព​ហាត់​ប្រាណ  ហាត់​ហ្វឹក​ហ្វឺន  និង​ការ​ប្រកួត មាន លក្ខណៈប្រមូល​ផ្តុំ  ហើយ​ក៏​មិន​ទាន់​អនុញ្ញាត ធ្វើ​សកម្មភាព​ឡើង​វិញ​ដែរ  ដើម្បី​បន្ត​ចូល​រួមចំណែក​ទប់​ស្កាត់​ការរីករាលដាលនៃ​កូវីដ​១៩ ហេតុ​នេះ​ចំពោះ​ការ​ប្រកួត​ជើង​ឯក​ថ្នាក់​ជាតិ តាម​​​ប្រភេទ​​កីឡា​ប្រចាំ​ឆ្នាំ ២០២០ គឺ​សហព័ន្ធ ណា​ដែល​មិន​ទាន់​បាន​ធ្វើ អាច​នឹង​​ពន្យារ​ការ​ប្រកួត ដល់ដើម​ឆ្នាំ​២០២១»៕

  • Loading...
  • Recent Posts