• កម្ពុជា ចង់រៀបចំឲ្យមានការប្រកួតអន្តរជាតិ នៅកីឡដ្ឋានធំ មុនប្រកួតផ្លូវការក្នុងស៊ីហ្គេម ឆ្នាំ២០២៣
    បាល់ទាត់ក្នុងស្រុក 2 months ago 119 Views

    មន្រ្តី​ជំនាញ​របស់​គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ ហៅកាត់ថា CAMSOC បាន​ឲ្យ​ដឹង​ថា CAMSOC និង​​សហការជាមួយ​សហព័ន្ធ​កីឡាបាល់​ទាត់កម្ពុជា ដើម្បី​នាំយកការ​ប្រកួត​បាល់​ទាត់​អន្តរជាតិ ទាំងលើកម្រិត​អាស៊ាន និងអាស៊ី យកមក​ធ្វើ​នៅ​ពហុកីឡដ្ឋានធំ (Main Stadium)  នៃពហុកីឡដ្ឋាន​ជាតិ​មរតក​តេជោ នៅ​មុន​ពេល​ពហុកីឡដ្ឋាន​ធំ​នេះ បើក​ឲ្យមានការ​ប្រកួត​ផ្លូវការ នៃព្រឹត្តិការណ៍​ស៊ីហ្គេម ឆ្នាំ​២០២៣។

    លោក វ៉ាត់ ចំរើន អគ្គលេខាធិការ CAMSOC បាន​និយាយ​​ថា កីឡដ្ឋាន​ធំ​នៃ​ពហុ​កីឡ​ដ្ឋាន​ជាតិ​មរតក​តេជោ នឹង​បញ្ចប់​ការ​សាងសង់​ជា​ស្ថាពរ ក្នុង​អំឡុង​ខែ​ឧសភា ឆ្នាំ​២០២១ ដើម្បី​បម្រើ​ដល់​ការ​រៀបចំ​ការ​ប្រកួត​កីឡាស៊ីហ្គេម លើកទី​៣២ ឆ្នាំ​២០២៣ ហើយការ​ប្រកួតបាល់​ទាត់​អន្តរជាតិនាន រួមទាំងការ​ប្រកួត​មិត្ត​ភាព​អន្តរជាតិ នឹង​អាច​​ធ្វើ នៅ​​ពហុកីឡ​ដ្ឋាន​នេះ ចាប់ពីពាក់កណ្តាល​ឆ្នាំ​២០២១​តទៅ។ ​

    លោក​បាន​បញ្ជាក់ថា៖​ «ក្រោយ​ពេល​បញ្ចប់​ការ​សាង​សាង់​កីឡ​ដ្ឋាន​ធំ​នេះ យើង​មាន​សកម្ម​ភាព​ច្រើន​ណាស់ត្រូវធ្វើ ដូច​ជា​ពិធី​សម្ពោធ​ជា​ផ្លូវការ ដែល​នៅ​ក្នុង​ពិធី​សម្ពោធ​នេះ ​នឹង​មាន​ការ​ប្រកួត​មិត្តភាព​រវាង​កម្ពុជា-ចិន ដោយ​យើងនឹង​​សហការ​ជា​មួយ​សហព័ន្ធ​កីឡា​បាល់​ទាត់​កម្ពុជា»។

    អ្នក​ជំនាញ​ផ្នែកកីឡា លោក វ៉ាត់ ចំរើន បាន​ថ្លែង​បន្ថែម​ថា៖​«​សម្រាប់​ការ​ប្រកួត​ជម្រុះ​អន្តរ​ជាតិ ក្នុង​​តំបន់​​អាស៊ាន ក៏​ដូច​ជា​ទ្វីប​អាស៊ី​ផ្សេងទៀត​ អាច​យក​មក​ប្រកួត ​នៅ​ពហុ​កីឡដ្ឋាន​ធំ នៃ​ពហុកីឡ​ដ្ឋាន​ជាតិ​មរតក​តេជោ ដើម្បី​សាក​ល្បង​នូវ​ទីលាន​ប្រកួត​បាល់​ទាត់​ថ្មី និង​​បរិយា​កាស​ថ្មី អ៊ីចឹង​ការ​ប្រកួត​បាល់​ទាត់​អន្តរ​ជាតិ​នា​នា អាច​នឹង​ចាប់​ផ្តើម​ធ្វើ​ទៅ​បាន ​ពី​អំឡុង​ពាក់​កណ្តាល​ឆ្នាំ​២០២១​តទៅ ​នៅ​ពហុ​កីឡ​ដ្ឋាន​ជាតិ​ថ្មី​នេះ»។

    ការ​លើក​ឡើងរបស់​លោក វ៉ាត់ ចំរើន ត្រូវ​បានធ្វើ​ឡើង បន្ទាប់ពី​លោក រួមទាំង​ក្រុមគណៈកម្មការជំនាញ​របស់​ CAMSOC ដឹកនាំ​ដោយ​លោក​ ថោន ខុន ដែល​ជាអនុ​ប្រធាន​អចិន្រ្តៃ CAMSOC ចុះ​ត្រួត​ពិនិត្យ​មើល​ការ​សាង​សង់​កីឡ​ដ្ឋានធំ​ នៃ​ពហុកីឡ​ដ្ឋាន​ជាតិ​មរតក​តេជោ ស្ថិតនៅខណ្ឌជ្រោយចង្វារ រាជធានីភ្នំពេញ កាល​ព្រឹកថ្ងៃចន្ទ ម្សិល​មិញ។

    សម្រាប់ការ​ចុះ​ត្រួត​ពិនិត្យ​មើល​ការ​សាង​សង់​កីឡ​ដ្ឋានធំ​ នៃ​ពហុកីឡ​ដ្ឋាន​ជាតិ​មរតក​តេជោ កាលពី​ថ្ងៃចន្ទ​នោះ លោក​រដ្ឋមន្រ្តី​ក្រសួងទេសចរណ៍ ថោង ខុន បាន​ថ្លែងថា ក្រុម​ហ៊ុន​ចិន ដែល​សាងសង់​កីឡ​ដ្ឋាន​ធំ គ្រប់​គ្រង​កម្មករ​ខ្មែរ-ចិន​ជាង​៥០០​នាក់​បាន​ល្អ​ណាស់ (​កម្មករ​​ខ្មែរមាន​​ជាង​៣០០​នាក់) គឺ​មាន​ភាព​​យឺតយ៉ាវ​តែ​ទៅ​លើ​ការ​ដឹក​ជញ្ជូន​សម្ភារ​បំពាក់​ដំបូល​​ប៉ុណ្ណោះ ដែល​ត្រូវ​កុម្ម៉ង​ទិញ​មក​​ពី​អាល្លឺម៉ង់​ជាដើម។

    លោក​បណ្ឌិត ថោង ខុន ​បាន​ថ្លែង​បន្ថែម​​ថា៖​«ពេល​យើង​បាន​ទៅ​ពិនិត្យ​មើល​សំណង់​កីឡដ្ឋាន​ធំ​នេះ គឺ​ជាមោទន​ភាព​ជាតិ មោទន​ភាព​សម្រាប់​ចំណង​មិត្តភាព​រវាង​កម្ពុជា-ចិន ដែល​នេះ​ គឺ​ជា​អនុស្សាវរីយ៍​មួយ​ដ៏​ធំធេង​ នា​ពេល​ពេល​បច្ចុប្បន្ន ក៏​ដូច​ជា​សម្រាប់​តទៅ​កូន​ចៅ​ខ្មែរ​​យើង ​នៅ​អនាគត​ផងដែរ»៕

  • Loading...
  • Recent Posts