• ក្រសួងអប់រំ សម្រេច​ឲ្យសហព័ន្ធ​កីឡាជាតិ បើក​ប្រាក់ឧបត្ថម្ភ​ តាម​ធនាគារអេស៊ីលីដា
    កីឡាផ្សេងៗ 1 month ago 72 Views

    ក្រសួងអប់រំ យុវជន និងកីឡា បាន​ឈាន​ដល់​ការ​ធ្វើ​ទំនើបកម្ម នៅក្នុងការ​បើក​ប្រាក់​ឧបត្ថម្ភ​ប្រចាំ​ខែ សម្រាប់សហព័ន្ធ​កីឡាជាតិ ពី​ការឲ្យគ្រូ​បង្វឹក និងក្រុមអត្តពលិក​ជម្រើសជាតិ ទៅ​​បើក​ដោយ​ផ្ទាល់ មក​ជា​បើក​អនុវត្ត ការ​បើក​​ប្រាក់​ឧបត្ថម្ភ​ប្រចាំ​ខែ តាម​ប្រព័ន្ធ​ធនគារ​អេស៊ីលីដា វិញ​ម្តង។


    តាម​លិខិត​លេខ​៦០១៩ អយក.មជហក របស់ក្រសួងអប់រំ យុវជន និងកីឡា ដែល​បាន​ជម្រាប​ជូន​មក​ដល់​ថ្នាក់​ដឹកនាំ​កីឡាជាតិ បាន​ឲ្យ​ដឹង​ថា ក្រសួងអប់រំ យុវជន និងកីឡា បាន​សម្រេច​ការ​ដាក់​ឲ្យអនុវត្ត​ជា​ផ្លូវការនូវ «ការ​បើក​​ប្រាក់​ឧបត្ថម្ភ​ប្រចាំ​ខែ តាម​ប្រព័ន្ធ​ធនគារ​អេស៊ីលីដា» ជូនគ្រូ​បង្វឹក គ្រូជំនួយ កីឡាករ កីឡា​ការិនី​ជម្រើសជាតិ ចាប់តាំង​ពី​ការ​ប្រមូល​ផ្តុំ​ ឆ្នាំ​២០២១​តទៅ។
    លិខិត​ដដែល​នេះ បាន​បញ្ជាក់ថា៖​ «ក្រសួង​សម្រេច​ធ្វើការ​ប្រមូល​ផ្តុំ និងដាក់​ឲ្យអនុវត្ត​ការបើក​ប្រាក់​ឧបត្ថម្ភ​ប្រចាំ​ខែ តាមប្រព័ន្ធ​ធនគារអេស៊ីលីដា ជូន​គ្រូ​បង្វឹក គ្រូ​ជំនួយ កីឡាករ កីឡាករ​ជម្រើសជាតិ ចាប់​ពី​ឆ្នាំ​២០២១​តទៅ។ ដោយ​ឡែក​ថវិកា របបអាហារ​ប្រចាំ​ថ្ងៃ ត្រូវទូទាត់ជូន​ទៅ​ភាគីផ្គត់ផ្គង់​អាហារ​ប្រចាំ​ថ្ងៃ ដល់​ក្រុមជម្រើសជាតិ ជា​ប្រចាំ​ខែ»។
    យ៉ាងណា​ក៏​ដោយ យោងតាម​លិខិត ដែល​​បាន​ធ្វើតាំង​ពី​ថ្ងៃទី​១៩ ខែវិច្ឆិកា ឆ្នាំ​២០២០ ហើយ​​ទើប​បាន​បញ្ចេញ​ជា​សាធារណៈ កាលពី​ថ្ងៃចន្ទ ម្សិល​មិញ​នេះ ក្រសួងអប់រំ បានស្នើ​ឲ្យ​សហ​ព័ន្ធ​កីឡាជាតិ អនុវត្ត​តាមការ​ណែនាំ​ចំនួន​៤ចំណុច ដែលមាន​ចែក​នៅ​ក្នុងលិខិត​នេះ ដើម្បី​ធ្វើ​ឲ្យ កិច្ច​ការទាំង​​នេះ អាចអនុវត្ត​ទៅ​បាន ប្រកប​ដោយ​តម្លាភាព គណនេយ្យ​ភាព និងប្រសិទ្ធ​ភាពខ្ពស់ ព្រម​ទាំង​ស្រប​តាម​សារាចរណ៍ណែនាំ​លេខ ០១២ សហវ ចុះ​ថ្ងៃ​ទី​២៩ ខែធ្នូ ឆ្នាំ​២០១៤ និងផែនការសកម្ម​ភាព​កែ​ទម្រង់​ការ​គ្រប់គ្រង​ហិរញ្ញសាធារណៈ។
    ជាមួយ​ការ​សម្រេច​ឲ្យ​​គ្រូ​បង្វឹក គ្រូជំនួយ កីឡាករ កីឡា​ការិនី​ជម្រើសជាតិ ​បើក​​ប្រាក់​ឧបត្ថម្ភ​ប្រចាំ​ខែ តាម​ប្រព័ន្ធ​ធនគារ​អេស៊ីលីដា នេះ គឺ​ថ្នាក់​ដឹកនាំ​សហព័ន្ធ​កីឡាជាតិ ភាគ​ច្រើន បាន​ឯក​ភាព ទៅ​លើ​វិធាន​ការ​នេះ  ព្រោះពួកគាត់ យល់​ថា ការ​ធ្វើ​ទំនើបកម្ម​នៃ​ការបើក​ប្រាក់​ឧបត្ថម្ភនេះ នឹង​មាន​តម្លាភាព​ជាងមុន ហើយការ​បើក​ប្រាក់ប្រចាំ​ខែ ក៏នឹង​មាន​ភាព​ទៀងទាត់​ ជា​ពេលកន្លងមក​ផងដែរ។​
    ​លោក នូ ចំរើន អគ្គលេខាធិការ​សហព័ន្ធខ្មែរ​កីឡា​ទោចក្រយាន បាន​ប្រាប់​ថា «ខ្ញុំ​គិតថា យើង​បើក​ប្រាក់​ឧបត្ថម្ភតាម​រយៈធនាគារ ដែល​ធ្វើតាម​ទំនើបកម្ម នេះ វា​ជា​រឿង​ល្អ​ណាស់ ព្រោះ​វា​​មាន​តម្លា​ភាព គណនេយ្យ​ភាព ប្រសិទ្ធ​ភាព ហើយ​យើងក៏សង្ឃឹម​ដែរថា ការ​បើក​ប្រាក់តាមប្រព័ន្ធ​ធនាគារនេះ នឹង​​បាន​ទៀត​ទាត់ប្រចាំខែ សម្រាប់​អត្តពលិក​ ព្រោះ​កន្លង​មក ការ​បើក​ប្រាក់នេះ មាន​ភាព​យឺត​យ៉ាវបន្តិច»។
    ចំណែក​លោក ធិន វិចិត្រ អគ្គ​លេខាធិការសហព័ន្ធ​កីឡា​ចំបាប់កម្ពុជា បាន​និយាយ​ថា៖​« ក្នុងនាមឲ្យ​​សហព័ន្ធ ខ្ញុំសូមអប​អរ​សាទរ​លើ​ការងារ​នេះ ព្រោះ​​ការ​បើក​​ប្រាក់​ឧបត្ថម្ភ​ប្រចាំ​ខែ តាម​ប្រព័ន្ធ​ធនគារ នេះ វា​បានបង្កភាព​ងាយ​ស្រួលដល់​ក្រុមអត្តពលិក​យើង ព្រោះ​បើ​គាត់ចង់បើក ឬមិនចង់បើក គឺគាត់​អាចរក្សា​លុយ ទុក​ក្នុងកុងធនាគារ​របស់​គាត់នេះ​បាន»៕

  • Loading...
  • Recent Posts