• ពេជ្រ ម្ទេសខ្លាំង ចង់ស្តាមុខមាត់ នៅគុនខ្មែរ ក្រោយខ្ទាតចេញពីក្រុមជម្រើសជាតិសកល
    ប្រដាល់ក្នុងស្រុក 5 months ago 127 Views

    អ្នក​លេង​កណ្តាប់ ​ពេជ្រ ម្ទេសខ្មាំង ដែល​មាន​ឈ្មោះ​នៅ​ក្នុង​បញ្ជី​ជាតិ​ថា ណាត ​សៀកនិន នោះ បាន​អះអាង​ថា រូប​គេ​នឹង​ខិតខំ​ហ្វឹក​ហាត់ ប្រកួត​ឲ្យ​បាន​ល្អ​ឡើង​វិញ ដើម្បី​ស្តាមុន​មាត់ នៅ​លើ​សង្វៀន​ប្រដាល់​គុនខ្មែរ ជា​ថ្មី បន្ទាប់​ពី​រូប​គេជួបការ​បាក់​ទឹក​ចិត្ត ​ប្រកួត​ចាញ់​ងើប​មុន​មិន​រួច ហើយ​ខ្ទាត់​ចេញ​ពី​ក្រុម​ជម្រើសជាតិ​ប្រដាល់​សកល​​នោះ។

    នៅមុន​ឈាន​ដល់​ដំណាក់​កាល​ដ៏ជូរចត់នេះ ពេជ្រ ម្ទេសខ្មាំង ធ្លាប់ជា​កីឡាករ​ជើង​ខ្លាំង ដែល​ពិបាក​នឹង​រក​គូ​ប្រកួត ទាំង​នៅ​ក្នុងទម្ងន់​៥៧គីឡូក្រាម និង​៦០​គីឡូក្រាម ហើយ​រូបគេ ក៏​ធ្លាប់បាន​ឈ្នះខ្សែ​ក្រវាត់មក​គ្រប់​គ្រង​ផងដែរ ហើយ​អ្វី​ដែល​កាត់​តែ​អស្ចារ្យ​នោះ សម្រាប់​ការ​ប្រកួត​ស៊ីហ្គេម នៅ​ម៉ាឡេស៊ី ឆ្នាំ​២០១៧ ម្ទេសខ្មាំង ក៏​ដណ្តើម​បានមេដាយ​សំរឹទ្ធ​ជូន​ប្រទេសជាតិ ផងដែរ។

    យ៉ាង​ណាក៏ដោយ ក្នុង​រយៈ​ពេល​ជិត​១​ឆ្នាំ​ចុង​ក្រោយ​នេះ ពេជ្រ ម្ទេសខ្មាំង បាន​ជួបការ​បរាជ័យងើប​មុខ​មិន​រួច។ ​ការ​ធ្លាក់​ចុះ​ទាំង​បច្ចេក​ទេស និង​គុណភាព​កម្លាំងនេះ ត្រូវ​បានប្រភពច្បាស់ការ​ទម្លាយ​ថា មក​ពី ម្ទេសខ្មាំង ខ្ជីខ្ជា​លើ​ការ​ហ្វឹក​ហាត់ និង​ខ្សោយ​ខាង​វិន័យ ហើយ​បញ្ហា​ទាំង​នេះហើយ ដែល​ធ្វើ​ឲ្យ ម្ទេសខ្មាំង ត្រូវ​បានកាត់​ចេញ​ពី​ក្រុមជម្រើសជាតិប្រដាល់​សកល នៅ​ឆ្នាំ​២០២០​នេះ។

    ជុំ​វិញ​បញ្ហា​នេះ លោក​ ប៊ុយ ​សុភ័ណ្ឌ​ អគ្គ​លេខាធិការ​សហព័ន្ធកីឡា​ប្រដាល់​សកល​កម្ពុជា បាន​ប្រាប​ប្រព័ន្ធ​ផ្សព្វផ្សាយ ក្នុងស្រុកថា​៖«​​ណាត ​សៀកនិន ​ឬ ​ពេជ្រ ​ម្ទេស​ខ្មាំង ​នេះ ​ត្រូវ​បាន​កាត់​ចោល​ ពី​ក្រុម​ជម្រើស​ជាតិ​ ​នៅ​ឆ្នាំ​២០២០​នេះ​ ដោយ​សារ​បញ្ហា​មិន​គោរព​វិន័យ ​ក្នុង​ការ​ប្រមូល​ផ្តុំ​ និង​ហ្វឹក​ហាត់ ហើយ​កីឡា ​បើ​ខ្សោយ​វិន័យ​ និង​ហាត់មិន​បាន​ល្អនេះហើយ ​គឺប្រកួតមិន​ឈ្នះ​គេ​ទេ»។

    យ៉ាង​ណា​ក៏ដោយ នៅ​ថ្ងៃ​អាទិត្យ​​នេះ ​ពេជ្រ ​ម្ទេស​ខ្មាំង ​ត្រូវ​បាន​គណៈ​កម្មការ​ប្រ​កួត​នៅ​សង្វៀន​ថោន​ បាន​​ផ្គូផ្គង​ឲ្យ​ប្រ​កួត​ម៉ារ៉ាតុង​ដណ្តើម​ប្រាក់លាន​ ទម្ងន់​៦០គីឡូក្រាម ជា​​​ថ្មី​ ជាមួយ​​កីឡាករ​ជើងខថ្មី៣នាក់​ទៀត ​ដើម្បី​ស្តា​មុខ​មាត់​ឡើង​វិញ ក្នុង​នោះ​មាន អេលីត​ ឡុង​ឡី ​មក​ពី​ក្លិប​ប៉ែន​កាត់​គុន​ខ្មែរ​ ​សំ ​អាន​ ​ក្លិបបញ្ជាការ​ដ្ឋាន​ទ័ព​ពិសេស​ និង​ សេក ​ចៅ​ជូត ​មក​ពី​ក្លិប​អង្គរ​ជ័យ​ខេត្ត​សៀម​រាប​។

    សម្រាប់​បេក្ខភាព​ទាំង​៣នាក់​​នេះ គឺ​មាន​បទពិសោធ​ប្រកួត​តិចជាង ពេជ្រ ម្ទេសខ្មាំង ដាច់​តែ​ម្តង ហើយបើកាល​ជំនាន់ ម្ទេសខ្មាំង នៅខ្លាំងវិញ គឺ​អ្នក​ទាំង​៣​នេះ មិនអាច​គេច​ផុត​ពី​ការ​សន្លប់នោះ​ទេ។ យ៉ាង​ណាក៏ដោយ នៅ​ពេលនេះ ម្ទេសខ្មាំង ក៏​មាន​ភាគ​រយខ្ពស់​ឈ្នះ​ផងដែរ បើ​សិន​គេ​ហ្វឹក​ហាត់​ដិត​ដល់ ហើយ​នៅ​ក្នុងចំណោម​អ្នក​ទាំង​៣​នេះ គឺ​មានតែ សេក ចៅជូត ម្នាក់​ទេ ដែល​មានសមត្ថ​ភាព​គួរសម នឹងធ្លាប់​បាន​ស្មើ​ពិន្ទុជាមួយ ម្ទេសខ្មាំង ក្នុងការ​ប្រកួត Mas Fight ៩នាទី កាល​ពី​ថ្ងៃទី​២ ខែសីហា នៅ​សង្វៀន​ថោន​នេះ។

    ទាក់​ទង​ទៅ​នឹង​ការ​ប្រកួតនេះ ពេជ្រ ម្ទេស​ខ្មាំង បាន​​​ប្រាប់ប្រព័ន្ធ​ផ្សព្វ​ផ្សាយ​​ថា​៖ «​នេះ​ជា​ពេល​វេលា ដែល​​ខ្ញុំត្រូវ​​ខំប្រឹង​ឡើង​វិញ​ ព្រោះ​​មួយ​រយៈ​ចុង​ក្រោយ​នេះ ​ខ្ញុំ​មិន​សូវ​បានហ្វឹក​ហាត់ ដោយ​ជីតា​ខ្ញុំ​ឈឺ​ ​បន្ទាប់​មក​គាត់​ស្លាប់​ ហើយការ​​ប្រកួត​ចាញ់ញឹកញាប់ បាន​ធ្វើ​ឲ្យខ្ញុំ​ចង់​បាក់​ទឹក​ចិត្ត​តែ​ម្តង​ ប៉ុន្តែ​សម្រាប់​ការ​ប្រ​កួត នៅ​​ថ្ងៃ​អាទិត្យ​នេះ​ ខ្ញុំ​ធានា​វ៉ៃ​អស់​ពី​សមត្ថភាព​ ក្នុង​នោះ​សង្ឃឹម​ឈ្នះ​ ដើម្បី​ស្តា​មុខ​មាត់​ឡើង​វិញ​ ដ្បិត​អី​ខ្ញុំ​ចង់​សាង​ភាព​ល្បី​ នៅ​គុនខ្មែរ​​ម្តង​ទៀត​»​៕

  • Loading...
  • Recent Posts